Hakan Fidan: “İran həqiqətən çətin vəziyyətdədir”
Gündəm
Hakan Fidan: “İran həqiqətən çətin vəziyyətdədir”
Expressxeberler.az xəbər verir ki, Türkiyənin xarici işlər naziri Hakan Fidan Nyu-Yorkda İranla bağlı açıqlamalar verib.
Fidan ABŞ-də iranlı həmkarı Abbas Əraqçi və amerikalı rəsmilərlə keçirilən görüşlərdə Tehran tərəfindən təqdim olunan təkliflər, eləcə də Hörmüz boğazının mümkün qədər tez açılması üçün irəli sürülən şərtlərlə bağlı fikir mübadiləsi aparıldığını bildirib.
Türkiyəli nazir İranın hazırkı vəziyyətinin mürəkkəb olduğunu vurğulayıb.
“İran həqiqətən çətin vəziyyətdədir. Sanksiyalar, müharibə təhdidi, hücumlar və hərbi əməliyyatlar var. Bununla yanaşı, İranın ortaya qoyduğu müəyyən mövqelər də mövcuddur”, – Fidan deyib.
O əlavə edib ki, görüşlərdə mövcud vəziyyətin necə idarə oluna biləcəyi, sülhə daha qısa müddətdə necə nail olmaq və müharibənin regiona yayılmasının qarşısını necə almaq barədə geniş müzakirələr aparılıb.
Qeyd edək ki, İran ABŞ-yə Hörmüz boğazının açılması və danışıqların bərpası ilə bağlı yeddi günlük plan təqdim etdiyini açıqlayıb.
Expressxeberler.az bölgədə baş verən son hadisələri izləyir.
