Baxçalıdan aydın mesaj- Azərbaycanın mövqeyi ədalətli və haqlıdır.

Milliyyətçi Hərəkat Partiyasının (MHP) lideri Dövlət Baxçalı Türkiyənin Türk dünyasından kənarda tutulması cəhdlərinə qarşı çıxış edib.

Expressxeberler.az xəbər verir ki, Baxçalı “Türkiyə olmadan Türk dünyası layihələrini həyata keçirmək cəhdlərini diqqətlə izləyirik” bəyanatı ilə bu istiqamətdəki proseslərə münasibət bildirib.

Onun açıqlaması Türkiyə ilə Azərbaycan arasındakı münasibətlər, eləcə də Türk dünyasının gələcəyi ətrafında müzakirələr fonunda diqqət çəkib.

Baxçalının mövqeyinə görə, türk dövlətləri arasındakı əlaqələr tarixi bağlara, suverenliyə, qarşılıqlı hörmətə və etimada əsaslanmalıdır. Məqalədə bu yanaşmanın Azərbaycan-Türkiyə münasibətlərinin qorunması baxımından əhəmiyyət daşıdığı vurğulanır.

Oktyabrın 23-də Dövlət Baxçalı Azərbaycanın Türkiyədəki səfiri Rəşad Aslanovla da görüşüb. Məqalədə bildirilir ki, görüş zamanı səfir Prezident İlham Əliyevin təşəkkürlərini çatdırıb və Azərbaycan-Türkiyə qardaşlığının müdafiəsi istiqamətində MHP-nin mövqeyinə görə minnətdarlığını ifadə edib.

Baxçalı isə Azərbaycana dəstəyini ifadə edərək iki ölkə arasındakı münasibətlərin qarşılıqlı hörmət, bərabər tərəfdaşlıq, etimad və qardaşlıq əsasında inkişaf edəcəyinə inandığını bildirib.

Məqalədə Türkiyədə bəzi qrupların Azərbaycan əleyhinə çıxışları və Azərbaycanın daxili məsələlərinə münasibət bildirmələri də tənqid olunur. Xüsusilə dövlət məktəblərində geyim qaydaları ilə bağlı qərarlara kənardan müdaxilə cəhdlərinin Azərbaycanın suverenliyi məsələsini gündəmə gətirdiyi qeyd edilir.

Vurğulanır ki, Azərbaycan müstəqil daxili və xarici siyasət yürüdür və ölkənin qərarları milli maraqlar əsasında qəbul edilir. Azərbaycan-Türkiyə münasibətlərinin möhkəmliyi isə qarşılıqlı hörmətə və hər iki dövlətin suverenliyinə hörmətlə yanaşılmasına bağlıdır.

Məqalənin müəllifi hesab edir ki, Türk dünyasının gələcək inkişafında Türkiyə və Azərbaycanın əməkdaşlığı mühüm yer tutur. İki ölkə arasındakı münasibətlərin qorunması üçün tarixi və mədəni bağlarla yanaşı, dövlətlərarası etimadın və qarşılıqlı hörmətin də əsas götürülməsi vacibdir.

‼️Hər gün Expressxeberler.az saytına daxil olub ölkədə və dünyada baş verən hadisələri dərhal oxuyun