Məkkə məscidində cinsi əlaqədə oldular – edam edildilər

Məkkədəki məsciddə “ədəbsiz hərəkət”: İki nəfər edam edildi

Expressxeberler.az xəbər verir ki, Səudiyyə Ərəbistanında iki Banqladeş vətəndaşı Məkkədəki məscidlərdən birində törətdikləri iddia edilən “ədəbsiz hərəkətə” görə edam olunub.

Səudiyyə Ərəbistanı Daxili İşlər Nazirliyinin məlumatına görə, Nazrul İslam Abdul Basir və Siti Ahter adlı şəxslər saxlanılaraq istintaqa cəlb ediliblər. Araşdırma başa çatdıqdan sonra iş məhkəməyə göndərilib.

Məhkəmə hər iki şəxsi təqsirli bilərək “tazir” cəzası çərçivəsində ölüm hökmü çıxarıb. Qərar səlahiyyətli orqanlar tərəfindən təsdiqləndikdən və kral fərmanı verildikdən sonra hökm icra edilib. Edamın çərşənbə günü Məkkə ərazisində baş verdiyi bildirilib.

Lakin Səudiyyə Ərəbistanı hakimiyyəti şəxslərin konkret olaraq hansı hərəkəti etdiyini açıqlamayıb. Hadisənin hansı məsciddə baş verdiyi və digər təfərrüatlar da ictimaiyyətə təqdim edilməyib. Söhbətin Məkkədə yerləşən Məscidül-Həramdan getdiyi ehtimal olunsa da, bu, rəsmi şəkildə təsdiqlənməyib.

Hadisə ilə bağlı Banqladeşdə də suallar yaranıb. Ciddədəki Banqladeş konsulluğu edamlar barədə əvvəlcədən məlumatlandırılmadığını açıqlayıb.

Konsulluq rəsmilərinin sözlərinə görə, məsələ ilə bağlı Səudiyyə Ərəbistanının Xarici İşlər Nazirliyinə diplomatik nota göndərilib və edamların rəsmi təsdiqi tələb olunub.

Səudiyyə Ərəbistanı Daxili İşlər Nazirliyi isə açıqlamasında Banqladeş diplomatik nümayəndəliyinə əvvəlcədən məlumat verilib-verilmədiyi məsələsinə toxunmayıb.

#Expressxeberler #Expressxeberler.az #SəudiyyəƏrəbistanı #Məkkə #Banqladeş #DünyaXəbərləri