İnsan yatarkən beynində nə baş verir? – Maraqlı kəşf
Cəmiyyət
Yaş artdıqca beyində bu proses zəifləyir – Alimlərdən mühüm araşdırma
Expressxeberler.az xəbər verir ki, insan yatarkən beynində baş verən mühüm proseslərdən biri də beyin-onurğa beyni mayesinin hərəkətidir. ABŞ alimlərinin apardığı yeni araşdırma bu prosesin yaş artdıqca zəiflədiyini üzə çıxarıb.
Tədqiqatın nəticələri “Nature Aging” elmi jurnalında dərc olunub.
Araşdırma çərçivəsində 18-39 yaş arası gənclərlə 60-84 yaş arası yaşlı insanların yuxu zamanı beyin fəaliyyəti müqayisə edilib. Bunun üçün elektroensefaloqrafiya (EEQ) və sürətli funksional maqnit-rezonans tomoqrafiyasından (fMRT) istifadə olunub.
Nəticələr göstərib ki, dərin yuxu zamanı gənclərin beynində beyin-onurğa beyni mayesinin hərəkəti daha güclü dalğalar şəklində baş verir. Yaşlı insanlarda isə bu hərəkət əhəmiyyətli dərəcədə zəif müşahidə olunur.
Alimlər bunu yaş artdıqca yuxu zamanı yaranan yavaş beyin dalğalarının azalması və beyin damarlarının fəaliyyətində baş verən dəyişikliklərlə əlaqələndirirlər.
Beyin-onurğa beyni mayesi beynin qorunmasında, daxili mühitin sabit saxlanılmasında və müxtəlif maddələrin daşınmasında mühüm rol oynayır. Əvvəlki tədqiqatlar bu mayenin yuxu zamanı dövranının beyində toplanan metabolik tullantıların xaric edilməsinə kömək edə biləcəyini göstərib.
Bununla belə, tədqiqatçılar bildirirlər ki, yeni araşdırmada tullantı maddələrin birbaşa xaric olunması ölçülməyib. Bu səbəbdən müşahidə edilən dəyişikliklərin Alzaymer və digər neyrodegenerativ xəstəliklərin yaranmasına təsiri hələ dəqiq müəyyən edilməyib.
Alimlər hesab edirlər ki, bu istiqamətdə aparılacaq əlavə araşdırmalar yaşlanma ilə beyin sağlamlığı arasındakı əlaqənin daha dərindən öyrənilməsinə kömək edə bilər.
Hər gün Expressxeberler.az saytına daxil olub ölkədə və dünyada baş verən hadisələri dərhal oxuyun.
#Expressxeberler.az #Sağlamlıq #Beyin #Yuxu
Kateqoriya: Sağlamlıq



