Bakıda bu binalar sökülür: Sakinlərə nə qədər ödəniləcək?
Gündəm
Bakıda 8 bina söküləcək – Sakinlərə kompensasiya və ya mənzil veriləcək
Expressxeberler.az xəbər verir ki, Bakının Nizami rayonunda 8 binanın sökülməsi və sakinlərin köçürülməsi planlaşdırılır. Söküntünün əsasən köhnə yataqxana tipli binaları əhatə edəcəyi bildirilir.
Söküntü nəzərdə tutulan ərazilər arasında Kamil Balakişiyev, İsmayıl Məmmədov, Rizvan Teymurov və Məmmədəli Şərifli küçələri, həmçinin Babək prospekti yer alır.
Azərbaycan Qiymətləndiricilər Cəmiyyətinin sədri Vüqar Orucun sözlərinə görə, yenidənqurma işlərinin bir hissəsi dövlət, digər hissəsi isə investorların vəsaiti hesabına həyata keçiriləcək. Bəzi ərazilərdə yeni yaşayış binalarının tikilməsi, digər sahələrdə isə park və yaşıllıqların salınması nəzərdə tutulur.
Söküləcək binalarda yaşayan sakinlərə kompensasiya ödənilməsi və ya yeni mənzillərin verilməsi planlaşdırılır.
V.Oruc yaşayış sahələri üçün 2000–2800 manat, qeyri-yaşayış sahələri üçün isə 2500–4000 manat aralığında kompensasiya ödənilməsinin mümkün olduğunu bildirib. Bununla belə, qeyd olunan məbləğlərin ilkin ehtimal olduğu, yekun rəqəmlərin qiymətləndirmə və dövlət qurumlarının qərarlarından sonra müəyyənləşəcəyi vurğulanıb.
Yerində yeni yaşayış binaları tikiləcək ərazilərdə sakinlərə mənzil təklif olunması, dövlət hesabına alınaraq abadlaşdırılacaq sahələrdə isə pul kompensasiyasının verilməsi nəzərdə tutulur.
Söküntü və köçürülmə prosesi mərhələli şəkildə həyata keçiriləcək. İlk olaraq mənzillərin və sakinlərin sayı müəyyənləşdiriləcək, daha sonra konkret binalarla bağlı qərarlar qəbul edilərək sakinlərə məlumat veriləcək.
Söküntünün başlanma tarixi və köçürülmə şərtləri də növbəti mərhələdə açıqlanacaq.
Hər gün Expressxeberler.az saytına daxil olaraq ölkədə və dünyada baş verən hadisələri dərhal oxuyun.
#Expressxeberler.az #Bakı #NizamiRayonu #Söküntü



